Aalten
Fouten voorbehouden. Heeft u correcties en/of aanvullende informatie? Reageer dan onderaan deze pagina.
“De Ormelstraote in Aalten is eneumd naor den dikken Ormel, umdat den daor ne riege huuze hef laoten bouwen. Ormel kon de stene veur dee huuze goedkoop leveren, want he had op de Haort zelf ne steenovvend. Waor den estaone hef weet ik neet, maor onzen buurman GatJan van “De Stoffer” hef der hen arbeiden egaone, iederen dag hen en weer lopen naor de Haort.
Ormel wonnen op de Kleuver op de Haort, daor had hee an ’t varkenshuusken ne ronden schorssteen laoten metselen net as ne fabrieksschorsteen, neet zo hoge, maor toch nog wal een meter of acht hoge. Behalve boer was Ormel ook nog poldermeister van het Waterschap van de Slingebeake. At hee dan is hier of daor kwam schouwen, dan zat hee op een dogkarretjen, etrokken deur een wit peerd. Hee bleef dan gewoon op ’t kaorken zitten, dan kon hee de hele beake bekieken en kon hee metene den schimmel vaste hollen.
De Ormelstraote is langen tied onverhard west. Eerste is een pad van veldkeien midden over an elegd, later bunt dee vervangen deur klinkers, maor doo stonnen der an ’t ende twee paole, zodat ze d’r neet met ne wagen of kaore met peerd deur konnen rien. In dee tied gingen d’r arbeiders van Brevoort naor de fabriek van Dreessen op ’t Blik en dee fietsen dan ’s morgens en ’s aovends deur de Ormelstraote.
Op ne morgen fietsen den olden Ebbers met ziene jongens ook weer deur de straote, plotseling gin der ne deure los van ene van dee huuze en ne vrouwe gooien den inhold van ne pispot dwars ovver de straote. Moor een gedeelte kwam op ’t stuur van de fietse terechte en an dat stuur had Ebbers ne rooien zakdook hangen en in den zakdook had Ebbers ziene botterham veur ’s middags eknupt. Ik zol haoste zeggen, smakelijk etten”, maar Ebbers hef zich ’s middags wat anders te eaten ehaald.”
Opa Lensink, 1982, Brevoort
Bron: Ne göpse vetelsels ovver Aalten en Bredevoort
Van deur tot deur
Adresboek 1934
Plaats een reactie