Nieuwe Aaltensche Courant, 2 december 1921
Wee t-e-meent hef dat Sunt neet in Holland kon kommen
Vanwege den legen waterstand
Dee hef zik vergist, want hej wal vernommen
Dat e toch eavenpart e-kommene is, in ’t land.
En wee ’t nog neet geleuft dee mot moar is zeen
wat ön spul ad ze in dit blad toch an goat beên.
Joa, aj toch zeet ’t is in een woord lomp
Allemoale advertenties van grei veur de klomp.
Doar hej WIJERS met zien niedig lekkere Botterbanket
Of wat iej ok vroagt al is ’t amulet
’n Dinée of Soepée, of iets veur de Luns
Hee mek et ow kloar, da’s veur ummes gin kunst.
En dan de firma KLUVERS ok neet te vergeaten
Ok allemoale fijn spul veur ’n mensch um te eaten:
Sukerbeestjes, Chocoladeletters, Banket en Fondant
In een woord doar kont ze terechte uut iederen stand.
Dan krieg iej doar den heer LAMMERS onder de Linden,
Daar köj ok heel wat lekkerniejen vinden;
Zoowal brood en stoete as fijn speculaas
En in toafelkooke is ’t ok gin slechten boas.
En goa iej noa de Achterstroate noa WEGGELAAR
Doar heb ze de Sunterklööskes ok al goar
Joa, doar is ok alles tip top en net
Uut e-stald. Zoowal Brood as Banket.
BLOMESATH dee met zien schoone adverteert
Hef dat ok nog neet zoo raar e-prakkezeert;
’n Poar warme pantoffels van Sunterkloas
Dat liekt miej wezelijk nog neet zoo dwoas.
G. OBERINK met zien collectie deakens, Och man,
Dat is ’t fijnste wat ne mensche moar hebben kan.
’t Magazijn DE DUIF, dat hej doar noast
Doar hej ön reuzencollectie van Sunterkloas
Um dat allemoale op te neumen zal miej neet lieken
En dörme roa ’k ow an: goat zelf moar hen kieken.
En de zoak van B. LIEVERS an de weg noa de Haart
is ok (noa proat ik Hollandsch) een ieders aandacht waard.
En de zoak van Mejuffrouw de Wed. GRAVEN
Doar heb ze artikelen veur boozen en braven.
Want heb iej soms ne deugniet dee dom is en lomp
Dan doo iej dee lekker ne stok in de klomp.
JOH. TE PASKE, dat is ok ön heel good adres.
Den hef met zien zoakjen dan ok wezelijk succes.
En ad iej soms is deur de Landstroat wilt goan
Dan blief iej veur de winkel van SOMSEN wal stoan.
En ok dee van VAN LOCHEM, dee is ok neet min
ln dee beide winkels doar krig ön ieder zien zin.
Wat iej ok moar hebben wilt, pannen en potte,
Vielen, zagen, hamers en slötte
En dan könt ze ow ok nog droadneagels verstrekken
En knieptangen um neagels uut de pöste te trekken.
En schaatsen; menschen dee moj ok nog koopen!
Want ’t is noo mooi wear um schaatsen te loopen.
En noo neet teggen proaten, umdat ’r gin ies is, nee nee
Now moj goan schoatsen, al is ’t op de Zuderzee.
En dan de Kapperszaak van onzen vrend KALF,
Doar scheart ze zoo fijn, dat weet iej neet half;
Rechts hej de schearkamer, links ön winkel van piepen
En doar köj ok reeme koope um ’t schearmes te sliepen.
Ok moj is goan noa BEUSINK, doar is ’t prachtig, ’t is bar,
Met recht heet dee winkel de Nieuwe Bazar.
Moar aj biej zien buurman E. HOGEWEG kiekt
En dee reuzenwinkels biej mekoar vergeliekt,
Dan zal ieder waldenkend mensch motten zeggen,
Dat ze ’t veur de stadsche Bazars neet of hooft te leggen.
En dan de fietsemakerieje van W. HENGEVELD
Levvert gauw en good veur neet te völ geld.
En in de Breveursche stroate biej W. HEINEN
Koop iej fietsen en motors veur grooten en kleinen.
Joa, fietse rien is aardig, ’k weet neet of iej ’t weet
Moar hoo gauwer aj tread, hoo gauwer ad ’t geet.
En dan goat is noa HOUWERS in de Gasthuusstroat.
Doar buj ok nog moar zoo neet uut e-proat.
Aj doar ’n ameublement koopt dan wik ow vertellen
Dan goaj voort neet wear bij ’n ander bestellen.
GERT WEENINK, dee ok in dit blad adverteert
Dee wont an dat ende nog lange neet verkeerd.
De bedeeninge is-t-er vlot, plezeerig en correct,
Veur zulke zaken hef ön ieder respect.
B.H. BRETHOUWER met zien manufacturen
Ad iej doar is effen deur de glaze wilt gluren
Dan vindt iej vaste iets wat ow zal passen
In boksen of borstrokke, ulsters of dassen.
En dan biej de fa. D.W. VAAGS, ne kruidenier in ’t fijne,
Doar köj insloan in ’t groote, moar ok in ’t kleine;
Joa, dee zaak is wal ’t meest gesorteerd
Dan moj moar is kieken, wat ze al neet adverteert.
De firma’s DEBBINK en OBERINK bunt wal gin buren,
Moar zee hebt beide ön zaak in manufacturen,
Galon, koord, band, kousen, sajetten,
Bloots den heer Debbink hef gin heude en petten.
B.J. LIEVERS ön winkel van stökke en piepen
En ön tip top inrichting um messen te sliepen.
En noo wille wiej is goan noa TE PASKE zienen Plas
Of doar veur de klomp nog wat te koopen was?
Joa, wat zak zeggen, low ’s kieken, ja, doar zaagt ze net met stoom
Ne balken van ne dikken holten boom.
En ’k wed den Te Paske mek vast goeje zaken
Want den hef ’t holt um ne Kloasklomp van te maken!
De firma BONGERS is ön zaak in heude en petten
En ’k roade ow an, doar terdege op te letten.
En dan G.J. LAMMERS an de andere kant
Den hef van ’t uutpakken ok aardig verstand,
Joa, ik geleuve menschen, doar moak iej wal keupkes
In mantels en jesse, hööke eugten en kneupkes
En loopt dan nog efkes deur noa de Kattenbarg
Dat geet wal bulte op, moar dat is neet arg,
Want doar wont HEERSINK nog de bakker
En den man hef de sloap ok good wakker.
Den hef botterletters, speculaas alles versch,
Bakerkindjes, sukerpupkes, dubbel en dwars;
En ne hoop Taai-Taai hebt dee menschen kloar
En lekker moar genog, goeien wien; iej wet wal neet woar?
En ten slotte mot ik ow allemoale roan
Um noa de Bookwinkel van DE GRAAFSCHAP te goan
Doar köj ok heel good veur de klomp wat bestellen.
En wieter wik ow dan moar niks meer vertellen.
As alleene: ik wensch ow uutbundig succes
En daj allemoale kont weten dat ’t Sunterkloas is ewest.
Gegroet, HEIN AN DE WEG.
